.: واجب الأصوات المزعجة :.

كلفني الأستاذ مساعد بحل واجب الأصوات المزعجة ..( و لأني ما حليت واجب من سنوات .. قررت أكتب رسالة بحث و أكيد إن شاء الله إمتياز  مع مرتبة الشرف ) ..

** الأصوات المزعجة ..

أنا أحب الهدوء .. و يزعجني أي صوت يبدد هالهدوء .. و الأصوات التي تزعجني أو تؤلمني كثيرة بذكر بعض ( شوي بس ) منها ..

…’

* صوت تكة إبرة الإنسولين الـ pen fill  إذا جيت إعطيها ولدي .. أحس صوتها و ألمها بقلبي .. تضايقني و تؤلمني .. و يمكن الدمعة تفر من عيني ..

* صوت جهاز قياس ضربات القلب في غرفة الطواريء أو العناية المركزة .. خصوصاً في الليل ..

* صوت الحريم في قسم الولادة .. فلم مرعب ( scream ) .. و تعاطفاً معهم أشاركهم و يمكن أكون بطلة الفلم .. شاركت في هالفلم 3 مرات .. و تظل أصوات الصراخ اللي ممكن يتخللها سب و شتم ولعن ( الحمد لله ماعمري سبيت أحد بس ممكن وقتها أدعي على نفسي بالموت ) ..  ذكريات مزعجة لا يمكن أن أنساها ..

* صوت ولدي الصغير و خصوصاً و هو ينادي على الشغالة .. يوقف أعلى الدرج و ينادي بأعلى صوته ( سيتي ) و ممكن يلحن إسمها ..  ينادي عليها ( إلى إن ترد عليه ) و لو ساعة ما عنده أي مشكلة ..

* صوت بنت أخوي الصغيرة ( لولو ) .. المشكلة طالعة ثرثارة لعمتها ( اللي أكيد و طبعاً  و بتاتاً  مو أنا )..

* صوت طقطقة الكورة .. إذا عيالي لعبوا بالحوش .. أحسها براسي ..

* أصوات لعبة call of duty .. إزعاااااااااااااااج و رعب ..

* صوت شغالتي ( سوما ) .. ما تعرف تتكلم بصوت عادي .. صوتها صراااااااااخ ..  و خصوصاً كلمة مدام ( مااااااااااااادددددددددااااااااام) تشدد على كل حرف و أحسها بتضارب .. و ياسلام إذا كلمتني و أنا غافلة .. يفز قلبي  .. يمكن يوم تجيني جلطة بسببها ..

…’

* صوت زميلة في العمل ( أ. أ ) .. صوتها حاد و عالي .. مع إن غرفتها بعيدة شوي عن مكتبي .. بس والله أسمعها و هي تسولف .. و إذا جت تكلمني ما أفهم ولا كلمة من حدة صوتها و لأنها ( تحتسي قصيمي قصيمي ) .. فأهز راسي أسوي نفسي فاهمة أبي الفكة .. و أستغرب من وين يطلع كل هالصوت ( ماشاء الله ) .. لأنها نحيفة مررررررررة  ..

* صوت زميلة ثانية في العمل ( أ. م ) .. صوتها عالي و حاد  و سواليفها كلها قتل وخطف و موت و فلانة تطلقت و فلانة تضاربت مع زوجها (نكد × نكد) .. و يا عذابي إذا قعدت بجنبي في أحد الإجتماعات ..

* صوت السكرتيرة ( ح ) .. المفروض في السكرتيرات اللباقة و الذوق و الإتكيت ..  ماعندها من هالأمور و لو شوي .. و فوق كل ذا صوتها عالي و كلامها ( دبش ) .. من دون مبالغة .. لو فيه أوراق لازم أسلمها لها .. أطلب من أحد ثاني يوصلها لأني أخاف أسمع منها كلمة أو تعليق ما يعجبني  و يمكن أتهاوش معها ..  

* صوت الحارس  أبو محمد  و هو يتهاوش مع السواقين أو  إذا أتصل علي يدور على أم محمد لأنها المسؤولة عن الخدمة في مكتبي ..  و يا ويل أحد يزعل أم محمد .. مره عاتبتها بكل أدب على أن المكتب عليه شوية غبار .. إشتكتني عنده .. و على طول أتصل علي و هاوشني .. الحين لو أشوف المكتب عليه كثبان رمل و لا كلمة و يمكن أشكرها بعد .. ( وش أسوي الخوف ) ..

* صوت شباب الحي و هم يفحطون أخر الليل  قدام بيتي لأن شارعنا يعتبر أوسع شارع بالحي ميزة صارت شي سلبي بسبب التفحيط .. أو و هم مشغلين صوت الأغاني على أعلى شي ..

* صوت الأغاني العالية عند الإشارة ..

* صوت بكاء الأطفال في أي مكان عام أو  في المسجد و خصوصاً في صلاة التراويح ..

* صوت الملعقة أو الشوكة إذا إحتكت بالإسنان .. أحس أسناني بتتكسر .. و صوت طقطقتها  بالصحن ..

* صوت أحد يأكل خيار .. حتى لو كنت أنا .. أزعج نفسي بس أحب الخيار ..

* صوت الأبواب في الشتاء ..

* صوت الرعد .. يزعجني و يخوفني ..

* أصوات هوشة .. و يا عيني إذا حريم .. الهوشات تزعجني و توترني .. أذكر مرره تهاوشوا أثنين من خواني ( كانوا وقتها في سن المراهقة ) و وصلت الأمور إلى مد الأيادي .. ( أغمن علي ما تحملت .. ) ..

* صوت الطق ( الأغاني ) بالزواجات .. أحس إني جوا سماعة مو قاعة .. و لازم الوحدة تصرخ بأعلى صوتها إذا تبي تسولف ..

…’

* صوت أم كلثوم و محمد عبده و رابح صقر ( بليز لحد يزعل ) .. أحب كلمات أغانيهم و يمكن تعجبني الموسيقي  .. بس أصواتهم ما تطربني و خصوصاً رابح صقر صوته مزعج جداً ..  و على كل حال ماني من عشاق الأغاني  .. بس أحب أسمع موسيقى هادئة من فترة لفترة ..

…’

.: و يؤلمني جداً بكاء أي طفل و أي إمرأة ..

.: يؤلمني أكثر صرخات الأطفال و الأمهات  في فلسطين و العراق ..

.: و يمزق قلبي صرخة المظلوم ..

…’

وش رايك أستاذ مساعد ؟ أكيد  امتياز !

…’

أمرر الواجب ..  لـ شوووق ( القمر ) .. و بسمة ( أحلى بسمة ) ..  أسماء ( وحشتيني يا عسل ) .. كائن حي .. حلمي معي .. ملونه ستيشن .. نجلاء .. smilefirst .. أمل ( glosseyes )  ..  عالية .. shoog .. همة .. أناأروى ..

و لـ الساري .. الناقد .. رادار .. عابر سبيل .. الخلوق .. الفيلسوف ..إبن الشمال ..  ظل ..

( و لكل مدون و مدونة ما حلو واجب الأستاذه فيميل ) ..

…’